అగ్రిగేట‌ర్ల‌కు సంబంధించి త్వ‌ర‌లో మార్గ‌ద‌ర్శ‌కాలు

హైదరాబాద్: గిగ్ , ప్లాట్‌ఫారమ్ కార్మికులు తలపెట్టిన నిరవధిక సమ్మెకు కొన్ని గంటల ముందు రాష్ట్ర ప్రభుత్వం జోక్యం చేసుకోవడంతో శ‌నివారం రాష్ట్ర వ్యాప్తంగా త‌ల‌పెట్టిన స‌మ్మెను విర‌మించేందుకు గిగ్, ప్లాట్ ఫామ్ సంస్థ‌ల నేత‌లు ఒప్పుకున్నారని ప్ర‌క‌టించారు మంత్రి డాక్ట‌ర్ వివేక్ వెంక‌ట‌స్వామి. సుమారు నాలుగు లక్షల మంది కార్మికులు ఈ సమ్మెలో పాల్గొంటారని అంచనా వేశారు. ఒకవేళ సమ్మె జరిగి ఉంటే హైదరాబాద్‌లో ఆహారం, సరుకుల డెలివరీ , రవాణా సేవలకు అంతరాయం కలిగేది. సచివాలయంలో కార్మిక శాఖ అగ్రిగేటర్ కంపెనీలు , కార్మిక సంఘాలతో సమావేశం ఏర్పాటు చేసింది. కార్మిక శాఖ మంత్రి చర్చలకు అధ్యక్షత వహించారు. కార్మిక సంఘాల ప్రతినిధులు తమ కష్టాలను, అలాగే సంక్షేమం , సామాజిక భద్రతకు సంబంధించిన డిమాండ్లను వివరించారు. ఈ సమస్యలను పరిష్కరించడంలో ప్రభుత్వానికి ఉన్న చిత్తశుద్ధిని మంత్రి వారికి తెలియజేశారు. సానుకూల స్పందన లభించడంతో, కార్మికులు సమ్మెను విరమించారు.

కార్మికుల హక్కులను రక్షించడానికి , సామాజిక భద్రతను కల్పించడానికి ప్రభుత్వం ‘గిగ్ వర్కర్స్ వెల్ఫేర్ యాక్ట్’ (గిగ్ కార్మికుల సంక్షేమ చట్టం)ను రూపొందించిందని డాక్టర్ వివేక్ వెంకటస్వామి తెలిపారు. దీని అమలుకు సంబంధించిన మార్గదర్శకాలను రూపొందిస్తున్నామని, త్వరలోనే అవి అమల్లోకి వస్తాయని పేర్కొన్నారు. అదనపు కార్మిక కమిషనర్ గంగాధర్ మాట్లాడుతూ బిల్లు ఆమోదం పొందిందని, మార్గదర్శకాలు ఇంకా రావాల్సి ఉందన్నారు. అగ్రిగేటర్లకు సంబంధించిన నిబంధనలను రూపొందించే బాధ్యతను రవాణా శాఖకు అప్పగించామని చెప్పారు. మంత్రి స్పందన పట్ల కార్మిక సంఘాల ప్రతినిధులు సంతృప్తి వ్యక్తం చేశారు. గిగ్ కార్మికుల కోసం ప్రత్యేక చట్టం సమర్థవంతంగా అమలు చేయబడి, శాశ్వత పరిష్కారం లభిస్తుందనే ఆశాభావాన్ని వారు వ్యక్తం చేశారు.