బాబా సాహెబ్ అంబేద్క‌ర్ జీవితం స్పూర్తి దాయ‌కం

లండ‌న్ : భార‌త దేశ రాజ్యాంగ నిర్మాత డాక్ట‌ర్ బాబా సాహెబ్ అంబేద్క‌ర్ జీవితం స్పూర్తి దాయ‌క‌మ‌ని అన్నారు సీఎం ఎ. రేవంత్ రెడ్డి. విదేశీ ప‌ర్య‌ట‌న‌లో భాగంగా మంత్రి శ్రీ‌దర్ బాబుతో క‌లిసి లండ‌న్ లోని చారిత్రక ‘అంబేద్కర్ హౌస్’ను సందర్శించారు. లండన్ స్కూల్ ఆఫ్ ఎకనామిక్స్‌లో చదువుతున్న సమయంలో (1921-22) బాబాసాహెబ్ డాక్టర్ అంబేద్కర్ లండన్‌లోని ప్రైమ్‌రోజ్ ప్రాంతంలో ఉన్న ’10 కింగ్ హెన్రీస్ రోడ్’ (ప్రస్తుతం ప్రపంచవ్యాప్తంగా ప్రసిద్ధి చెందిన చిరునామా) వద్ద నివసించారు. డాక్టర్ అంబేద్కర్ నివాసాన్ని సందర్శించడం ఒక తీర్థయాత్ర లాంటిది. ఇది జీవితకాల స్ఫూర్తినిస్తుంది. సామాజిక న్యాయం పట్ల నాలో నూతన అంకితభావం కలుగుతోంది అని ముఖ్యమంత్రి రేవంత్ రెడ్డి సందర్శకుల డైరీలో రాశారు.

ఈ ‘అంబేద్కర్ హౌస్’ ఇప్పుడు డాక్టర్ అంబేద్కర్ ఆశయాలు, వారసత్వానికి – అంటే రాజ్యాంగబద్ధత, సమానత్వం, కులరహిత , అణచివేత లేని సమాజం, అలాగే సామాజిక న్యాయం యొక్క ప్రాధాన్యతకు – అంకితం చేయబడిన ఒక మ్యూజియంగా మారిందన్నారు. ఈ ఇంట్లో బాబాసాహెబ్‌కు సంబంధించిన ఛాయాచిత్రాలు, రచనలు , వ్యక్తిగత వస్తువులు ఉన్నాయని తెలిపారు. సుమారు గంట సేపు సాగిన ఈ పర్యటనలో, అంబేద్కర్ మ్యూజియం ఏర్పాటులో కీలక పాత్ర పోషించిన ‘యాంటీ-కాస్ట్ డిస్క్రిమినేషన్ అలయన్స్’ (ACDA) చైర్ పర్సన్ సంతోష్ దాస్ (MBE) యూకేలో బాబాసాహెబ్ జీవితానికి సంబంధించిన వివిధ అంశాలను వివరించారు.