హైదరాబాద్ : గోల్కొండ కోటలో జరిగే శ్రీ జగదాంబ మహంకాళి బోనాల ఉత్సవాల సందర్భంగా, హైదరాబాద్ ట్రాఫిక్ పోలీసులు నగరంలోని పలు ప్రాంతాల్లో ట్రాఫిక్ మళ్లింపులను ప్రకటించారు. భారీ సంఖ్యలో భక్తులు ఆలయాన్ని సందర్శిస్తారని అంచనా వేస్తున్నందున జూలై 23, 26 తేదీలలో ఉదయం 6:00 గంటల నుండి రాత్రి 10:00 గంటల వరకు ఈ ప్రత్యేక ట్రాఫిక్ ఏర్పాట్లు అమలులో ఉంటాయి. మక్కై దర్వాజా, ఫతే దర్వాజా , బంజారా దర్వాజా మార్గాలతో సహా గోల్కొండ కోటకు వెళ్లే రోడ్లపై భారీ ట్రాఫిక్ రద్దీ ఉంటుందని అంచనా వేశారు. రద్దీని తగ్గించడానికి, నర్సింగి, లంగర్ హౌస్, షేక్‌పేట్, ఫిల్మ్ నగర్ , సమీప ప్రాంతాల నుండి వచ్చే వాహనాలను ప్రత్యామ్నాయ మార్గాల ద్వారా మళ్లిస్తారు. ప్రయాణికులు తమ ప్రయాణాలను ముందుగానే ప్లాన్ చేసుకోవాలని, రద్దీ ఎక్కువగా ఉండే సమయాల్లో ఈ మార్గాలకు దూరంగా ఉండాలని సూచించారు.
ద్విచక్ర వాహనాలు, కార్లు , బస్సులలో వచ్చే భక్తుల కోసం ట్రాఫిక్ పోలీసులు ప్రత్యేక పార్కింగ్ ప్రాంతాలను ఏర్పాటు చేశారు. సందర్శకులు కేటాయించిన ప్రదేశాలలో మాత్రమే వాహనాలను పార్క్ చేసి, అక్కడి నుండి ఆలయానికి నడిచి వెళ్లాలని కోరారు సీపీ. భక్తులు తమకు దగ్గరగా ఉన్న పార్కింగ్ ప్రాంతాలను సులభంగా గుర్తించేందుకు వీలుగా మార్గమధ్యలో క్యూఆర్ కోడ్‌లను ఏర్పాటు చేశారు. ట్రాఫిక్ సిబ్బందికి సహకరించాలని , వీలైనంత వరకు ప్రత్యామ్నాయ మార్గాలను ఉపయోగించాలని ప్రజలకు విజ్ఞప్తి చేశారు. బోనాల ఉత్సవాల సమయంలో ట్రాఫిక్‌కు సంబంధించిన సహాయం కోసం ప్రజలు హైదరాబాద్ ట్రాఫిక్ పోలీస్ హెల్ప్‌లైన్ (9010203626)ను సంప్రదించాల‌ని కోరారు.
