హైద‌రాబాద్ : తెలంగాణ ప్రభుత్వం కీల‌క నిర్ణ‌యం తీసుకుంది. ఈ మేర‌కు రాష్ట్రంలో ప్ర‌స్తుతం చోటు చేసుకున్న కరువు, ఎల్ నినో పరిస్థితులను అధిగమించేందుకు గాను సీఎం రేవంత్ రెడ్డి ఆదేశాల మేర‌కు ప్రత్యేక క‌మిటీని ఏర్పాటు చేసింది. ఈ విష‌యాన్ని సీఎస్ వెల్ల‌డించారు. రాష్ట్రంలో కరువు, ఎల్‌నినో పరిస్థితులను సమీక్షించి, వాటిని అధిగమించేందుకు అవసరమైన చర్యలను సిఫార్సు చేయడానికి తెలంగాణ ప్రభుత్వం మంత్రివర్గ ఉపసంఘాన్ని ఏర్పాటు చేసింది. ప ముఖ్యమంత్రి భట్టి విక్రమార్క మల్లు అధ్యక్షతన ఏర్పాటైన ఈ ఉపసంఘంలో మంత్రులు ఎన్. ఉత్తమ్ కుమార్ రెడ్డి, పొంగులేటి శ్రీనివాస రెడ్డి, దనసరి సీతక్క, తుమ్మల నాగేశ్వరరావు, వాకిటి శ్రీహరి సభ్యులుగా నియమితులయ్యారు.
ముఖ్యమంత్రి ప్రత్యేక ఆహ్వానితుడిగా సీనియర్ అధికారి కె. రామకృష్ణారావును నియమించగా, ప్రణాళిక శాఖ కార్యదర్శి ఈ ఉపసంఘానికి కన్వీనర్‌గా వ్యవహరించనున్నట్లు ప్ర‌భుత్వ ప్ర‌ధాన కార్యదర్శి సంజ‌య్ జాజు వెల్ల‌డించారు. ఇదిలా ఉండ‌గా ఈ మంత్రివర్గ ఉప సంఘం రాష్ట్రంలో పరిస్థితులను ఎప్పటికప్పుడు పర్యవేక్షిస్తూ, కరువు , ఎల్‌నినో ప్రభావాలను అధిగమించేందుకు అవసరమైన చర్యలు తీసుకోవాలని స్ప‌ష్టం చేసింది. కేంద్ర ప్రభుత్వంతో చర్చించాల్సిన అంశాలపై సిఫార్సులు సమర్పించాలని ప్రభుత్వం ఆదేశించింది. మ‌రో వైపు ఇప్ప‌టికే కరువు దెబ్బ‌కు జ‌నం అల్లాడుతున్నారు. రాబోయే ఎండా కాలం నీళ్లంద‌ని ప‌రిస్థితి దాపురించేలా ఉంది.
