అమ‌రావ‌తి : ఏపీ బీజేపీ పీవీఎన్ మాధవ్ కీల‌క వ్యాఖ్య‌లు చేశారు. ‘సూపర్ ఎల్ నినో’ ప్రభావం దృష్ట్యా వాతావరణ మార్పులను తట్టుకునే వ్యవసాయ పద్ధతులను పాటించాలని సూచించారు. ‘సూపర్ ఎల్ నినో’ ముప్పును ఎదుర్కోవడానికి రైతులు వాతావరణ పరిస్థితులకు అనుగుణంగా ఉండే పంటలను , నీటి వినియోగం తక్కువగా ఉండే వ్యవసాయ పద్ధతులను అవలంబించాలని ఆయన కోరారు. అనిశ్చిత వర్షపాతం , నీటి కొరత కారణంగా ఖరీఫ్ పంట దిగుబడి, ఆహార భద్రతకు ముప్పు వాటిల్లే అవకాశం ఉందని, తగిన ముందస్తు చర్యలు తీసుకోకపోతే ప్రమాదం తప్పదని ఆయన హెచ్చరించారు. అమరావతిలో జరిగిన బీజేపీ కిసాన్ మోర్చా రాష్ట్ర కార్యవర్గ సమావేశంలో (కార్గిల్ విజయ్ దివస్ సందర్భంగా) మాధవ్ ప్రసంగించారు.
1999 యుద్ధంలో ప్రాణాలర్పించిన సైనికులకు నివాళులర్పించిన ఆయన, దేశ ఆహార భద్రతను కాపాడే రైతులు దేశానికి “రెండవ సైనికులు” అని పేర్కొన్నారు. నీటి వినియోగం ఎక్కువగా ఉండే వరి సాగుకు బదులుగా చిరుధాన్యాలు, పప్పుధాన్యాలు , ఇతర ప్రత్యామ్నాయ పంటల సాగు వైపు మళ్లాలని, అలాగే వ్యవసాయ నిపుణులు , కృషి విజ్ఞాన కేంద్రాల సలహాలతో శాస్త్రీయ వ్యవసాయ పద్ధతులను పాటించాలని ఆయన పిలుపునిచ్చారు. వ్యవసాయ ఆదాయాన్ని పెంచేందుకు పంట ఉత్పత్తులకు విలువ జోడించడం అత్యవసరమని రాష్ట్ర బీజేపీ అధ్యక్షుడు అన్నారు. ఇందులో భాగంగా, దేశీయ, ఎగుమతి మార్కెట్ల కోసం తోతాపురి మామిడి, అరటి , జీడిపప్పు ఉప-ఉత్పత్తులను ప్రాసెస్ చేయాలని ఆయన సూచించారు. అలాగే, ప్రధాన మంత్రి ఫసల్ బీమా యోజన, ప్రధాన మంత్రి కృషి సించాయీ యోజన, సాయిల్ హెల్త్ కార్డ్స్ (నేల ఆరోగ్య కార్డులు) వంటి కేంద్ర ప్రభుత్వ పథకాల గురించి ఆయన వివరించారు.
కేంద్ర ప్రభుత్వ సంక్షేమ పథకాలపై అవగాహన కల్పించేందుకు గ్రామ స్థాయి కమిటీల ఏర్పాటుతో పాటు, 5,000 మంది యువ రైతులతో భారీ సదస్సును నిర్వహించనున్నట్లు మాధవ్ ప్రకటించారు.
